काठमाडौं। नयाँ भेरिएन्ट सहितको नेपालमा फेलिएको दोस्रो चरणको कोरोना संक्रमणको रोकथाम र नियन्त्रणका थाइल्यान्डले सहयोग पठाएको स्वास्थ्य सामग्री आज आइपुगेको छ। परराष्ट्र मन्त्रालयका अनुसार थाइल्यान्डको राजपरिवारले सहयोग स्वरुप पठाएको स्वास्थ्य सामग्रीहरु थाइ एयर फोर्सको जहाजमार्फत काठमाडौँ आइपुगेको हो।
थाइल्याण्डले नेपाललाई १० लाख थान सर्जिकल मास्क, व्यक्तिगत सुरक्षा साधन (पीपीई) गाउन ११ हजार ५२० थान, पीपीईको लेग कभर १० हजार जोर, पीपीई सर्जिकल क्याप १० हजार थान, फेसशिल्ड पाँच हजार, र्यापिड एन्टिजन युनिट २० हजार युनिट, फिङ्गर टिप्स पल्स अक्सिमिटर ६०० थान, डिजिटल थर्मोमिटर एक हजार ५०० थान, अक्सिजन नाजल ३० थान, अक्सिजन कन्सन्ट्रेटर आठ थान लगायत सामाग्रीहरु सहयोग गरेको हो ।
स्वास्थ्य सामग्रीहरु नेपालका लागि थाइ राजदूत भोषिता भोरासाफले त्रिभुवन अन्तर्राष्ट्रिय विमानस्थलमा आयोजित एक कार्यक्रमबीच स्वास्थ्य तथा जनसंख्या मन्त्री हृदयेश त्रिपाठीलाई हस्तान्तरण गरेका हुन् ।
